ဘဝအစီအစဉ်ဇယား

“ငါ ဘာဖြစ်ချင်လဲ… ဘာလုပ်မလဲ”
ဘဝအစီအစဉ်ဇယား (life plan) ဆွဲကြည့်မယ်။
ကြီးကြီးကျယ်ကျယ်တော့ မဟုတ်ပါ။ ကိုယ်ဘာလုပ်မလဲဆိုတာကို အချိန်ကာလဆိုတဲ့ ဘောင်ထဲကို ထည့်ပြီးဆွဲကြည့်တာပါ။ စဆွဲတော့ ၂ဝဝ၄။ ဒါပေမယ့် အဲဒီတုန်းကတော့ ခဏခဏပြင်သည်။ (Excel ထဲ ဆွဲထားတော့ အလွယ်တကူ ပြင်နိုင်သည်ကော) အချိန်အကွက်ကလေးတွေ ဟိုရွှေ့ဒီပြောင်း။
Time frame … ဘောင်ခတ်ထားသောအချိန်… ကိစ္စတစ်ခုပြီးမြောက်ဖို့ သတ်မှတ်ထားသောကာလ ဆိုတာ ဘဝမှာ အရေးအကြီးဆုံးပါ။
ဒါပေမယ့် ဘဝအတွက် ကြီးမားတဲ့ စီမံချက်တွေအတွက်တော့ ၂ဝဝ၆ အစပိုင်းလောက်ကစပြီး ကောင်းကောင်းဆွဲဖြစ်ပါတော့တယ်။ ဒီမှာတော့ အစီအစဉ်ကို အသေမထားပါဘူး။ အရှင်ထားထားပါတယ်။ ရည်မှန်းချက်ကိုလည်း တစ်ခုမဖြစ်နိုင်ရင် အနီးစပ်ဆုံးဖြစ်နိုင်မယ့်တစ်ခုကို အသင့်ပြင်ထားပါတယ်။ အမြဲနှစ်ခွတွေးပါတယ်။ (လုပ်ချင်တာ ဖြစ်ချင်တာတွေ အများကြီးလျှောက်ထားရင်တော့ လမ်းပျောက်ပါမယ်။) ဒီတစ်ခါမှာတော့ အချိန်ကို အတတ်နိုင်ဆုံး လုံးဝမပြောင်းတော့ပါဘူး။
ဆွဲထားတဲ့အထဲမှာ အဓိက သုံးချက် ပါဝင်ပါတယ်…
Career development (အသက်မွေးဝမ်းကြောင်းဖွံ့ဖြိုးမှု)
Academic development (ပညာရေး ဖွံ့ဖြိုးမှု)
Personal development (ကိုယ်ပိုင်ဘဝ ဖွံ့ဖြိုးမှု) တို့ပါပဲ။

အခုလိုဆွဲထားလိုက်တော့ ယခုလက်ရှိ ၂ဝဝ၈ မှာ ပြီးခဲ့တဲ့အတိတ်ကို ပြန်ကြည့်ရင် ကိုယ့်ရည်မှန်းချက် ဘယ်လောက်အတိုင်းအတာထိ ပြည့်မှီပြီလဲ… ဘယ်လို အခွင့်အလမ်းသစ်တွေ ဘဝအတွက် ထပ်ရခဲ့လဲ… ဘာတွေကော ဆုံးရှုံးသွားခဲ့လဲ… ပြန်ကြည့်နိုင်ပါတယ်။
အဲဒီလိုကြည့်လိုက်တော့… … …
အသက်မွေးဝမ်းကြောင်းအတွက်တော့ အခွင့်အလမ်းသစ်တွေ ရလာတာကိုတွေ့ရပါတယ်။ ပညာရေးတော့ ကျောင်းက တွက်ထားတဲ့အချိန်ဘောင်ထဲမှာ မပြီးသေး။ ကိုယ်ပိုင်ဘဝအတွက်လည်း မအောင်မြင်သေးပါဘူး။ ဆန်းစစ်ကြည့်လျှင် ကိုယ်ပိုင်ဘဝက ပညာရေးပေါ်မှီခိုနေရပါတယ်။ (Academic development is a function of personal development) Personal Dev. = f (Academic Dev.)
အခုလို ဘဝအစီအစဉ်ဇယားကြီးဆွဲတဲ့နေရာမှာ ဗေဒင်ဆရာဟောထားတဲ့ အချက်တွေလည်း ထည့်သွင်းစဉ်းစားပါတယ်။ (တစ်ဦးနှင့်တစ်ဦး ယုံကြည်ချက်ချင်းမတူတဲ့အတွက် ဤအချက်ကို လက်ခံနိုင်ချင်မှ လက်ခံနိုင်ပါလိမ့်မယ်။ ကွဲပြားခွင့်ရှိပါသည်။) အနာဂတ်ခန့်မှန်းချက်မှာ အကောင်းထက် အဆိုးကို အလေးထား စဉ်းစားပါတယ်။ ဥပမာ - ဒီကာလ ဒီအချိန်အတိုင်းအတာအတွင်း အိမ်ထောင်မပြုသင့်ဆိုလျှင် ဇယားဆွဲတဲ့အခါ ရှောင်ဆွဲပါတယ်။

အရင်းနှီးဆုံး သူငယ်ချင်းတစ်ယောက်ကတော့ ကျမရဲ့ဘဝဇယားကြီးကြည့်ပြီး ဟားပါတယ်။ မည်သို့ပင်ဖြစ်စေပါ... လူငယ်တွေအတွက် ရည်မှန်းချက်ချတဲ့အခါ... ဘဝဇယားက အထောက်အကူပေးပါတယ်။